Tuesday, April 25, 2006

ang among lab liter... gitype ni bibi munchkin

dear pangga indai bibi doll,

pangga indai bibi doll, nag unsa ka diha? gibisbisan ko na diay ang imong santan sa ngilit. naluto na pud diay to imong utmil. dai, cup d ba ka dai? nitawag man gud si indai aruray. naa kuno'y bag-ong brochure sa abon. pangga indai bibi doll, pagkamingaw niining payaga. ang mga bungbung, gimingaw na sa imong mga bugnaw nga pulong, sa imong mga mandar, sa imong bahikhik ug sa pagsampit nimo sa akong ngalan indai.

kahibaw man ko ba... gimingaw man sad ka nako. sige na gud, tinggi na ko. kamabaw ba atong butanga. kahinumdum pa ka gahapon? sa kusina? gasturya sturya pa ta? gikusi ko ang imong mapuwa puwahong aping, gikusi mu pud ang aping ko. gihungitan ko ikaw sa init mong tinughong, gihungitan mu pud ako. gagukud gukud pa kita sa sala, ug sa dihang nadam-ag ka, gisalo tika...

pangga indai bibi doll, wa ko man gyud kadto tuyua na ipayarok sa imo kadtong kape. matay! nalimut man gayod ko sa pagbutang ug asukar sa dihang nilabay ka sa akong tungod dai ug nakaplagan ko ang kahumot sa imuhang johnsons. pina da to ni ibyang? pastilan gyud aning tiguwang na ta...

dai, maglimpyo sa ko sa pasong. mayta mahuwasan na ka sa imong kalagot nako sa akong pagbalik. hinaut unta nga makita na nako ang imong tam-is nga pahiyum...

Nagmahal,
Dodong Bibi Doll



(By the munchkins: Bejay V., Shane B., Elisabeth B., Rhea T., Lourdes P. and Celeste C.)

2 Comments:

Blogger theresianangbisdak said...

lingaw ko, mga mare--januar

3:24 PM  
Blogger theresianangbisdak said...

dir dodong bibi doll,
saba diha. taudtaud na kong nag-antos og sigeg punit kada mahulog kanang imong postisong gitay-an. pwerte nang sakita sa akong arthritis. ambot lang og kang kinsa nang imong gihunahuna anang cup b. sa lain tingali na. nagpaklaro gyug ka. ug, hoy dodong bibi doll, husto na nang pakyut-kyut nimo. kadtong kape nga imong gihatag, pastilan, grabe og tama. lima ko ka adlaw nga wala nakatulog. bisan sa tungang gabii, naglihok gihapon ang akong hunahuna. hasta ang hagok sa lamok ako gyung madungog. ug, hoy, unsay johnsons nga imong giingon? ka-cheap pud nimo dodong bibi doll. imported ni uy gikan sa lungsod sa alcoy. sagol kini dolomite ug mga buwak nga utot-utot. bag-o pa kini og ingon nila "it's not out in the market yet". busa, usa ko sa mga nag-una og gamit niini.

pastilan, dodong bibi doll, ayaw na lang pagdahum kon suklian pa ta ka sa imong gibati. mahimo na lang nga dragon kanang mga nagkalapok nga mga wati, di gyud mahitabo nga sugton ta ka.

aduna koy laing crush og kumingking ra ka sa iyang ka-gwapo. makit-an nimo siya sa matag propaganda sa 2big. ang iyang pangalan si Budoy, usa siya ka silibriti. dili parehas nimo nga usa lang ka tanod uyamot.

dinhi na lang ko kutob, ug ayaw nako bibi-bibiha ha sukad karon. kay dili ko nimo bibi. ako si bubu. bye.

8:36 PM  

Post a Comment

<< Home