Wednesday, April 26, 2006

Lab Litir sinulat ni Bejay Villaflores

Dear Lab,

Gisurang-surang ang gibudlay kong kagabhion sa mga pinong buhakhak na nagagikan sa lagiti nianang elektrik pan na gubaon. ang gikahibulngan ko lamang lab, kay kini aduna'y pagka-angay na moduyog dungan sa banlas sa kamingawon ning maong gutlua. og samtang ang elektrik pan mopahiyum sa iyang lingin na ulo og mokawat og lingiw sa makadiyut, gihandum ko hinuon ang mga pagpa-cute mo kanako niadtong dili pa kita uyab. pagka-matiaw-tiawan mo.

kay lab, ang maong elektrikpan, bisan sa pag-inusara niya sa pag-ngaab niarong gabhiuna tama, sa pagsuway kong kutluon kini pinaagi sa usa ka tuplok, gibungog gayud ako sa kiwang na kahilom.

sama kakiwang sa kahidlaw ko manang katawa mo.

ang katong lanoy mo na katawa ba sa dihang gi-habhab ko ang litson na gihaon mo sa akon plato. pastilan, mua'g gigitik sa agta oi. kadto ganing nangaligo ta og dagat, ingon ka gayud ka nako na dako ka og lamoy. ikaw gayud lab oi, gigutom man gud ko niatong higayuna, gutom ang paggamangka. ikaw ang nagbugsay, ako, tigtutok kanimo. makagutom ka man diay?

pero lab, bisan lugos ko mang mandaran ang adlaw na makipagdapog sa buwan, dugay pa gayud ako makapamanka og balik. dili man gud ko mosakay kung dili ikaw ang tig-bugsay. pagka-hait gud sa init. tuklohan pa lang unya ko sa iho.

bitaw lab, para kanimo, kaskason ko ang numero sa kalindaryo aron yagawon ang mga pitsa, ang puwa palumbaon sa itom mahiduol laman ang adlaw na matagamtam ko usab ang Nescafe 3-in-one taliwala sa pagpayantak og pag-luwaw, ang katawa mo.

lab, pinalangga ko, ang pagka way kahumanang sa pitik nianang orasan, sama ka wala'y tapos sa paghuwat ko na makaplagan usab ang imohang pa-cute-cute na siplat, atoang holding has. himaya na sama sa mabugnaw na dapit niining bartolina kong kahon.

gihulatan ka diring dapita,
imong pinangga

PS: lab, gibayaran mo ba ang hangin aron mobagnod kanako karung gabhiuna? ang elektrikpan na gubaon, ang nescafe 3 in one, ang kahilum...bitaw lab, seryus ba...kakonsaho mo ba?

0 Comments:

Post a Comment

<< Home