Friday, April 21, 2006

Nay,HIGANTE ANG NEWYORK ni bejay villaflores

NAY, HIGANTE ANG NEW YORK

Dear NaY,

Pagka kuyawa lagi! Namugnaw og nitikig ang akong palad sa dihang nasinati ko na gayud ang katugnaw sa gibantug nilang siyudad na tigtukaw.

Og gani, nagsugod na ang akong pagtukaw sa dihang naglingkod pa ako sa Cathay Pacific na eroplano, naghuwat sa landing. Gianinaw ko lamang sa hilom ang mga kasakay kong tumtomon, samtang sila nagtagawtaw og mga pinulongang makabuhat og pitik sa akong bisdak na dalunggan. Dili man sa gusto ko silang tamayon, apan samaw lantawon ang mga nagbuwaw-buwaw na buhok sa mga kano—giparisan og blue o lunhawng mga matang nahisama sa mga iring.

Gipugos kong tak-umon lamang ang akong baba aron malikayan ko ang pagsagbat sagbat sa istorya. Dili man gud ko ka-relate. Og basin dili sad sila makasabot nako. Sa kamingaw, gihagit ko na lamang ang akong kaugalingon sa pagdakop kung hain ang gigikanan sa naglanog-lanog na “Ngiga noh?” og “Ah!, kuyawa gud!.
Hapit ko na lamang lubagon ang akong liog sa pagpangandoyng masakpan ko ang mga tingog. Ug sa wa magdugayng paglingi-lingi, nakaplagan ko gayud ang lima ka itom na ulo— Lima ka bisdak susama kanako nagdasok sa ngilit, nag-chika og nanlibak.

Ah, kuyawa gud!

Kuyaw, kay sa dihang natagamtam ko ang una kong mga tunob sa New York, nabati ko ang pinugngang iktin sa kasing-kasing. Obyus ba? Eksayted. Maayong pagkahimutang ang landinganan. Obsirbant man gud sila sa polisiyang pagpalinya. Aduna sa’y nahisagul na mga Asyanong, ang uban adunay gisugat, uban bag-ong abot, og ang uban sad manlargahay pa.
Bilib sad ko aning mga langyawng buwaw da kay isig pagpagawas man sa ilang maayuhong mga gadyit. Mga bidyo kam og istil kamira. Ang gikahibulngan ko lamang kay wa may magtix-tix oi! Aduna man gani bitbit na selpon, sa dalunggan man sad hinuon mahimutang. Wa nalikayang pangutan-on ko ang kaugalingon na wa siguroy unli og nonstop nganhi noh? Wirdo ang maong lugar, susama kawirdo sa akong gibating kasaag.

Daghan og kalahian nganhi sa New York. Ganina lang, bilow siro digris kuno ang kabugnawon. Labihan ang katugnaw! Madungog ko na gud ang akong ngipon na mokagut og magsingki-singki. Isog kaayu ang katugnaw nay, kay kadtong dyakit na imong gipabawn nako, sa kabag-on niadto? Nadutlan gihapon sa tugnaw. Napugos na lang gud ko sa pagpangita og trench coat. Kana bang tag-as na dyakit na sul-uton sa mga artista sa tv. Diyot ra man sad unta ang pagtultol ko sa mga sininaan, aduna say daghan na maayuhong trench coat. Ingon pa dyud gani ang sales lady “It looks so hip on you!” .Hip lagi apan taktak sad ‘tawn akong gamayng sapi kung paliton ko tong Versace.

Intawn ning si Inday nimo nay, gi-antos na lamang sa kadiyut ang katugnaw hantud malipayun kong nakaplagan ang usa ka thrift store. Dinhi, adunay mga anindot na panapot, mga dyakit, bags ug uban pa sa mas barato na kantidad. Kung masuwertehan ka, aduna sa’y mga brand-new, brandid pa dyud. Sa atoa pa ni nay, gitawag na ni og ukay-okay. Haaaay, hinglabihan ko nang mingawa sa Colon og Freedom Park, sige pa ka og pangukay didto nay?

Sa kakutihon sa mga kalyi, makalinga kini madugay. Dili maihap kung kapila ako nasaag og nakatultol usab, saag na sad og tultol usab, saag na sad og tultol, pastilan oi!. Bisan gani og padulong lamang sa akong gilupyohan, mawala gihapun. Mas-maayo gayud tingaling nagpatuo kong undangan ang pagpangapi. Kalimtanon na, nasamutan pa sa kalibog sa lugar. Walay dyip na naay ruta, mahal sad ang patak sa taksi. Pagkalisod baya matiman-an sa mga pangan sa kalye.

Apan,paborito ko gayud ang higanteng mga tubod dinhi, da bes ang tubig na mo-ambak og molut-hang padulong sa langit—mga water pawntens ba. Kanal ra ma’y naa sa ato.

Higante ang New York. Ang pawntens higante, og hasta sad ang bildings, higante. Habog kaayo na magsakit na gud kanang liog nimo tungod sa paghangad-hangad. Pero ang labaw na nakapanglangyaw kanako, mao ang mga tawong 6 pooter. Mag baw gud intawon ning si inday nimo og kinto-kinto, mailhan lamang na diyese-otso. Lapad sad ang mga dalan sa New York. Imbes na 2-lane na susama sa ato, 4-lane nganhi.

Aduna man sad hinuoy daghang mamuno, mga nawg piniriso... apan paranoyd gayud tingali ang mga pulis dinhi, kay wa ma'y kahumanan ang pag-libot-libot. Aduna sa’y makililimos, apan susyal man gihapon kay anaa may nindot na panapot. Aduna man sa'y pagka-angid sa atoa, aduna sa'y paghkasahi.

Okupado man sad ka pirme dinhi sa New York nay, bisi og madasig usab and dagan—pariha sa atoa na mapildi ka sa gira kung ikaw langayan, matod pa nimo—apan kong sa Pinas akong singot, magtubod susama sa pag-agas sa gripo?... dinhi sa New York, sa katugnaw, motikig.

Gimingaw kanimo og sa
niluto mo na adobo,
Imong pinalanggang anak

0 Comments:

Post a Comment

<< Home